今天要收起開心, 收起了公仔, 今天我要懷念我所飼養過又離開了我的小動物..
唔經唔覺又六年了, 六年來我一直沒有做好一個好主人, 直到昨晚, 生活在我家五年半多的大兔子 by by走了, 可恥的是, 作為主人的我, 竟然發現不到牠的不存在...
昨晚回家後, 平常的我都會望一望兔仔籠的, 但昨晚家中的廳燈出現怪聲, 回家的注意力都分散在燈上, 之後就入房睇流行東京及整理有關日本旅行的資料~~
半夜臨瞓覺前聽到媽媽在廳自言自語的 : 得返你一個, 係咪好寂寞呀 ? ? (當時波沒有理會的... ) 之後媽媽就叫我出去, 佢問我, 覺唔覺得小左一隻呢? 我話 : 係啵? 點解的, 小左邊隻呀? 睇清楚先知byby不見你, 之後我就問點解 ? 媽咪話 : byby今日走左了~ 今早打風好遲先起身, 起身個陣, 媽媽入廚房餵貓, 爸爸在廳餵兔仔, 個陣, 爸爸大嗌話隻兔仔死左呢~ 媽媽都唔信的... 睇真d, byby真係死了... 當時 妹妹仲瞓在byby隔離 (妹妹係另一隻兔仔) 聽完之後我好唔開心呀! 我望住妹妹, 覺得我對佢地唔住呀! 佢地的一生比我困在籠裡, 自從佢地大左, 放佢地出來之後就好難呢~因為佢地鐘意咬電線, 又鐘意周圍排毒... 最慘的就係貓貓會追住佢地來打... 所以我好小放佢地出來的~~
妹妹我係 2002年 10月01日買佢回來, 同年同月同星期姐姐就買了byby 回來, 妹妹係小be送我的一份生日禮物~ 因為當時香港流行龍貓, 因為龍貓太貴了, 所以買了一隻好似龍貓的兔仔給我, 小時候的妹妹, 細細隻, 好得意的, 我仲成日帶佢出去旺角同小be一齊出街, 一齊去打機, 細隻到可以放入衫袋都唔覺得佢阻住的~~ 由於當時的小be鐘意流連機舖, 機舖空氣不好, 所以我都冇再帶妹妹出街呢~ 轉眼間又過了六年了~ 望著妹妹一天一天的長大, 有時我都會在家擺放木板, 間一個空間來給兔仔在家活動, 較早的日子, 佢地都會走出來行行跳跳的, 日子耐左, 佢地開始唔鐘意了, 就算放佢地出來, 佢地情願走進籠裡~~
其實我都幾衰的, 成日口口聲聲話想送走佢地, 因為佢地搞到屋企好大陣味... 我唸佢地都唔想的, 佢地成日食生果, 搞到屋企多烏蠅仔飛來飛去, 我在家中, 見到都覺得辛苦, 咁佢地呢? 佢地生活在狹窄的籠子裡, 生活了大半生, 但只得兩餐溫飽... 唔知兔仔有冇思想的呢?
byby走了, 對byby來講可能係一總解脫, 佢可以投胎再做其他的小動物或者人, 但剩下來的妹妹, 可能就只有孤獨了~
唔知妹妹又會點唸呢? 唔知妹妹佢知唔知byby走左呢? 擔心的不止妹妹的將來, 我擔心的是byby為什麼離開呢? 是因為老了? 病了? 定係受了傷細菌感染呢?? 我擔心妹妹會不會受到影響~ ??!
日後只有妹妹一個了, 我會多d留意及照顧佢, 我會在妹妹餘下來的日子, 買佢鐘意食的, 小時間的妹妹我真係買好多零食給他的, 唔知佢仲記唔記得呢? 希望佢唔會受到byby的影響, 繼續健健康康的成長~
昨晚眼見妹妹成老的身軀, 又因為byby咬甩晒佢d毛, 真係有d擔心佢會冷病的, 希望在生毛的日子, 佢可以堅強的捱過~~
byby 對不起, 我困了你的一生, 是我令你一生都困在籠子裡, 如果當天我冇買妹妹, 姐姐就唔會買byby回來... 我不配作一個好主人, 但餘下來的日子, 我會因為今次byby的離開, 我會好好的照顧妹妹, 亦唔會再亂買小動物~
希望大家睇到我呢個blog之後, 下次買小動物前, < 停一停唸一唸 > 唔好累左佢的一生呢~ ! !
其實百厭仔同曳曳豬等等的, 都係我養的小兔子, 但不夠幾個月就死了, 當中百厭仔是最愛的小兔, 好可愛又好乖的, 但在一個夜晚, 佢離開了其他小兔, 走到另一邊, 靜靜的離開了, 身邊有很多排泄物的, 可能小時候腸胃不好, 食得太多草了... 其實我養過好多隻的, 另外一隻白色的小兔, 半夜聽著佢發出慘叫聲, 我就同媽媽去睇佢, 點知見到佢口鼻都好污濁, 好辛苦的樣子, 佢肚屙得很呢.. 眼見辛苦的樣子, 我同媽媽都感到好難過, 當晚又比水佢飲, 又幫佢清潔, 最後不足一小時,佢就已經離開了, 媽媽抱著佢的, 我同媽媽就目送了它的最後一程.... 之後先知, 原來小兔唔舒服係會食返自己的排泄物的, 可能就係因為咁樣,所以佢死前口鼻都咁污濁... 記得當晚同媽媽望著小兔離開, 我好傷心的喊了出來呢~ 因為我幫不到佢, 我眼白白望著佢離開! 當時仲記得媽媽講過, 就係咁所以唔鐘意我地養小動物, 唔鐘意害了一條生命
如果記得, 我就唔應該買妹妹回來呢~ 我一次又一次的害了一條生命
最後希望大家, 買小動物之前 < 停一停, 唸一唸 > 唸清自己有冇能力去養佢地, 照顧佢地一生, 千祈唔好掉佢地出街就算呀! 被飼養的小動物已經失去了自我保護或求生的意識, 通常被遺棄之後, 可能比貓狗咬死, 被車撞死或者比變態佬打死.. 所以請大家千萬不要遺棄小動物 ! !
怪post的百厭仔
呢個係妹妹小時侯的樣子 ~
妹妹是 1-10-2002 開始飼養的妹妹, 現在仍然飼養中的
留言列表
